Binəqədi rayonu, Biləcəri qəsəbəsi, 5-ci şimal massivində sakinlər illərdir susuz qalıblar. Bu haqda bu gün, 14 mart tarixində Bakuplus.az ARB-yə istinadən xəbər verir.
Sakinlərin sözlərinə görə, ərazidə 2 su xətti var. Onlardan birində su kəsilib, digərindən isə su verilmir.
“Burada 2 su xətti gedirdi, biz suyun olmadığı xətdəyik. O biri xətdən bizə calaq verin, özümüz çəkək. Onsuz da bu biri suyu öz vəsaitimizlə çəkmişdik”, – deyə sakinlər şikayət edirlər.
Bildirilir ki, son 5 ildə onlara ayda 1 dəfə su verilir. O da ancaq şikayətlərdən sonra 1 günlük açılır, daha sonra yenidən bağlanır.
“Mənim uşaqlarım nə qədər nəm salfetlə əllərini yuyacaqlar?! Su olmaya-olmaya qəbz gətirib qoyurlar qabağımıza”, – deyə onlar əlavə ediblər.
“Azərsu”dan məsələ ilə bağlı bildirilib ki, həmin ərazi birbaşa magistral kəmərdən qidalanır.
“Vaxtilə vətəndaşlar özləri həmin kəmərdən normalara uyğun olmayan su xətləri çəkiblər. Evlərin sayı çoxaldıqca su xətləri tələblərə cavab verə bilməyib. Gələcəkdə su təchizatı ilə bağlı tədbirlər görüləcək”, – deyə “Azərsu” ASC-nin mətbuat katibi Anar Cəbrayıllı qeyd edib.
