Binəqədi rayonu, Biləcəri qəsəbəsi, məhəllə 5057/68 ünvanı, 2, 3 və 4-cü binaların yerləşdiyi ərazi baxımsız vəziyyətdədir. Bu haqda bu gün, 15 may tarixində Bakuplus.az Real TV-yə istinadən xəbər verir.
Doqquzmərtəbəli binalarda yaşayan yüzlərlə sakini əhatə edən ərazidə işıqlandırma sistemi yoxdur, tullantı konteynerləri mövcud deyil. Həmçinin binaların zirzəmilərinə sular axır. Bu da həşəratların mənbəyinə səbəb olur və nəmlik yaradır. Bildirilir ki, pis qoxudan evlərini belə tərk edənlər olur.
“Burada 180 ailə yaşayır. Hər ailədə orta hesabla azı 5 nəfər var. Camaat insan kimi yaşaya bilmir. Biz insan kimi nəfəs ala bilmirik. Gərək bina dağıla. Bu qədər millət ölə. Ondan sonra ayılacaqlar”, – deyə sakinlərdən biri şikayət edir.
Sakinlərin sözlərinə görə, ərazidə işıqlandırma sistemi olmadığından tüfeyli həyat tərzi sürənlər də bura üz tuturlar.
“Avtomobillərin nömrələrini açıb aparıblar. Dəfələrlə narkomanlar gəlib, şəxsən mənim qapımın ağzında uzanıb yatanlar olub. Qaranlıqda rahat yerdə münbit şəraitdir onlar üçün”, – deyə yerlilər qeyd ediblər.
Zibil konteynerləri isə ərazidə yeganə söhbətgahın yanında yerləşdirilib. Bu da bir sıra problemlərə səbəb olur, əsasən də yay aylarında.
“Azərsu”dan məsələ ilə bağlı bildirilib ki, binanın zirzəmisində olan problemlər yaxın zamanda aradan qaldırılacaq. Həmçinin həmin zirzəmidə drenaj sisteminin qurulması ilə bağlı aidiyyəti üzrə məsələ qaldırılacaq.
Binəqədi rayon Mənzil-Kommunal Təsərrüfat Birliyindən isə deyildi ki, sözügedən ünvanda çeşidləmə sisteminə keçid ediləcək və narıncı və yaşıl konteynerlər yerləşdiriləcək. Bununla da sakinlərin narahatlığına səbəb olan məsələ aradan qaldırılacaq. İşlərin 5-7 gün ərzində başlaması planlaşdırılır.
İşıqlandırma ilə bağlı isə artıq layihənin olduğu və ilin sonuna qədər yeni sistemin quraşdırılacağı qeyd olunub.
