Bakının Binəqədi rayonu, Binəqədi–Novxanı yolunun hər iki tərəfində boş ərazi zibil içindədir. Bu haqda bu gün, 18 aprel tarixində Bakuplus.az ARB Media-ya istinadən xəbər verir.
Sözügedən ərazidə nə kanalizasiya, nə də zibil qabları var. Bu səbəbdən də çirkab su və məişət tullantıları boş əraziyə atılır. Ərazini üfunət bürüyür və antisanitariya vəziyyəti yaranır.
“Zibil qabı qoyulan yerdə yaşayış yoxdur. İnsanlar böyük boruların üzərinə çıxmalı olurlar ki, zibil atsınlar”, – deyə sakinlər şikayət edirlər.
Onlar bildirirlər ki, ərazi yerli sakinlər tərəfindən mütəmadi təmizlənirdi, ancaq maşınlar gəlib buralara zibil tökürlər. Yığılan zibillər səbəbindən ərazidə itlər də çox olur.
Binəqədi Mənzil-Kommunal istismar Sahəsinin rəsmi nümayəndəsi Vüsal Veysəllinin verdiyi məlumata görə, sözügedən ərazidə lazımi tədbirlər görüləcək.
“Orada vətəndaşların da üzərinə məsuliyyət düşür. Mütəmadi olaraq bayram və qeyri-iş günlərində daşımalar aparılır. Ancaq vətəndaşlar yenə ərazini zibilləyirlər”, – deyə V.Veysəlli qeyd edib.
