Binəqədi rayonunun əsas yollarında mütəmadi olaraq yenidənqurma işləri aparılsa da, bəzi məhəlləarası yollar hələ də təmir edilməyib. Bu haqda bu gün, 8 noyabr tarixində Bakuplus.az Xəzər Xəbər-ə istinadən məlumat verir.
“Baksol” yaşayış massivinin İncəçay küçəsində yaşayan sakinlərin sözlərinə görə, bir neçə il əvvəl onların yaşadıqları bu küçə asfaltlanıb. Ancaq bir müddət sonra ərazidə kanalizasiya xətlərinin yenilənməsi çərçivəsində yollar qazılıb. İşlər bitsə də, asfalt qatı bərpa edilməyib.
Daha bir ünvanda, DSK adlandırılan ərazidə yaşayan sakinlər də yollardan narazıdırlar. İritonnajlı yük maşınları əvvəllər asfalt olan yolu dağıtdığından yağan yağış gölməçə yaradır. Ərazidə, həmçinin kanalizasiya quyuları və yağış barmaqlıqları da yoxdur. Nəticədə yağışdan sonra yığılan su uzun müddət ərzində yolda qalır.
Binəqədi Rayon İcra Hakimiyyətindən bildirildi ki, hər iki ünvanla bağlı Azərsu ASC-yə müraciət olunub. Yaxın zamanda küçəyə kanalizasiya xətləri çəkiləcək. Həmin işlər bitdikdən sonra yollar asfaltlanacaq.
