Bakının Binəqədi rayonu, Bakı–Şamaxı yolunda sakinlər yollarda piyada keçidlərinin olmamasından narazıdırlar. Bu haqda bu gün, 30 mart tarixində Bakuplus.az ATV News-a istinadən xəbər verir.
Çiçək qəsəbəsi, Sülh küçəsində piyada keçidi inşa olunsa da, piyadalar ondan istifadə etmək üçün 2-3 km yol qət etməlidirlər. Daha sonra piyada zolağı çəkilib, ancaq problem yenə də bitməyib. Sakinlərin sözlərinə görə, onlar həmin yolu keçən zaman öz həyatlarını təhlükəyə atırlar.
“Anamı da maşın vurmuşdu burada. Demək olar ki, hər gün burada avtoqəza baş verir. Piyada zolağı olan yerdə işıqfor quraşdırılsa, lap yaxşı olar. Həmçinin ərazidə işıqlandırma da yoxdur”, – deyə sakinlər şikayət edirlər.
Binəqədi rayon İcra Hakimiyyətindən məsələdən xəbərdar olduqlarını bildiriblər və qurum cari ilin yanvar ayında Azərbaycan Yerüstü Nəqliyyat Agentliyinə (AYNA) məktub ünvanlayıb.
