Binəqədi rayonunda yerləşən tarixi hamam baxımsız vəziyyətdədir. Bu haqda bu gün, 24 aprel tarixində Bakuplus.az ARB-yə istinadən xəbər verir.
1915-ci ildə inşa edilən Hacı Əmrah hamamı 1980-ci ilə qədər insanlara xidmət edib. Fəaliyyətini dayandırandan sonra hamam baxımsız qalıb. Belə ki, içəri tullantılarla doludur. Burada şprislər və çirkli döşəklər də görmək olur. Bu da binanın narkomanların yuvasına çevrilməsindən xəbər verir.
“Narkomanlar pəncərəni sındırmışdılar, oradan içəri girib gecələyirdilər. Gəldim, oranı tikdim. Dəmir məhəccərləri aparmışdılar, qapıya dəmir barmaqlıq düzəltdirdim, qapını vurub ağzını bağladım”, – deyə hamamın adını daşıdığı Hacı Əmrahın nəvəsi Əmrah İsayev qeyd edib.
Onun sözlərinə görə, hamamı bərpa etmək istəsə də, şəxsi vəsaiti buna yetməyib. O da rəsmi qurumlara müraciət edib. Mədəni İrsin Qorunması, İnkişafı və Bərpası üzrə Dövlət Xidməti hamamı tarixi abidələr siyahısına salsa da, başqa heç bir addım atmayıb.
“Hamam yerli əhəmiyyətli tarix-memarlıq abidəsi kimi dövlət qeydiyyatındadır. Sözügedən tarixi abidə gələcəkdə əsaslı təmir olunacaq”, – deyə Mədəni İrsin Qorunması, İnkişafı və Bərpası üzrə Dövlət Xidmətinin mətbuat katibi Fariz Hüseynli qeyd edib.
