Binəqədi rayonu, 25-ci korpus, 1-ci mədəndə içməli su küçələrə axır. Bu haqda bu gün, 3 aprel tarixində Bakuplus.az Real TV-yə istinadən xəbər verir.
Sakinlərin sözlərinə görə, 7 aydır içməli su dayanmadan onların küçəsinə axır. Su borusunda yaranan nasazlıq səbəbindən su küçələri basır. İnsanlar küçə ilə hərəkət etməkdə çətinlik çəkirlər.
“Kustar üsulla suyun axınını qonşunun məhəlləsinə yönəltmişik. Qonşu gəlib qabağını kəssə, biz suyun içində qalacağıq. Suyun təzyiqi artdıqca küçədə su, palçıq əlindən hərəkət etmək müşkülə çevrilir”, – deyə sakinlər bildirirlər.
“Azərsu” ASC-dən məsələ ilə bağlı bildirilib ki, onlara bu günə qədər hər-hansı müraciət daxil olmayıb.
“Həmin ərazidə yolun hərəkət hissəsində su xəttində qəza baş verib. Artıq Binəqədi rayon Sukanal İdarəsinin əməkdaşları tərəfindən qəza yerinə baxış keçirilib. AAYDA-dan razılıq verilən kimi qazıntı işlərinə start veriləcək”, – deyə qurumdan bildirilib.
AAYDA isə icazənin artıq verildiyini vurğulayıb.
