Paytaxtın Binəqədi rayonunun Mir Cəlal küçəsində hökm sürən antisanitar vəziyyət sakinləri narahat edir. Onlar problemin köklü şəkildə həll olunmasını istəyirlər. Bu haqda bu gün, 24 iyul tarixində Bakuplus.az ATV-yə istinadən məlumat verir.
Sakinlər iddia edirlər ki, problemin kökü tullantı qutularının sayının az olmasından, hələ üstəlik, vaxtlı-vaxtında daşınmamasından qaynaqlanır.
“Biz məcburuq burdan maska ilə keçməyə. Mən bu binada yaşayıram. Bir də görürsən, hər gün dalbadal yığışdırırlar, bir də görürsən, yoxa çıxırlar. Zibil qutuları çox olsa, lap yaxşı olar”, - sakinlər şikayət edirlər.
Reportaj efirə getdikdən sonra Binəqədi rayonu Mənzil Kommunal İstismar Sahəsinin
əməkdaşları tərəfindən ərazi tullantılardan təmizlənib. Qurumdan bildirildi ki, bu ünvanda mütəmadi olaraq, təmizlik işləri həyata keçirilir. Hər bir binanın qarşısında tullantı qutuları var. Və bina sakinləri yalnız onlara məxsus tullantı qablarına zibil atarsa, belə bir vəziyyət də yaranmaz. Dəfələrlə sakinlərə də bununla bağlı müraiət olunub. O da qeyd olundu ki, antisanitar vəziyyətin qarşısını almaq üçün əraziyə yeni tullantı qutuları gətiriləcək.
