Binəqədi rayonu, Geoloji Kəşfiyyat Agentliyi yataqxanasında insanlar bərbad şəraitdə yaşayırlar. Bu haqda bu gün, 26 dekabr tarixində Bakuplus.az İctimai TV-yə istinadən xəbər verir.
Məcburi köçkünlərin yaşadıqları binanın zirzəmisinə su dolub. Bu da nəmişlik yaradır, divarlar ovulub tökülür, pis qoxu və ağcaqanad baş alıb gedir. Bu hal 7 ildir davam edir.
“Keçən il pensiya pulu ilə emulsiya çəkmişdim, divarlar yenə qap-qaradır. Uşaq, böyük – hamısı xəstədir. 2-3 xalçanı üst-üstə səririk ki, soyuq olmasın”, – deyə sakinlər şikayət edirlər.
Onlar hər il öz vəsaitləri hesabına mənzillərini təmir etdirməyə məcbur olurlar. Rəsmi qurumların isə məsələyə baxmadıqlarını deyirlər.
“Azərsu” ASC-dən bildirdilər ki, sözügedən bina onların balansında deyil. Binəqədi RİH isə onların ərazisində belə bir binanın varlığından xəbərsiz olduğunu deyib. Geoloji Kəşfiyyat Agentliyi isə araşdırma aparılacağını qeyd edib.
