Binəqədi rayonu, Mirmahmud Kazımovski küçəsində yerləşən binanın sakinləri illərdir çıxarış ala bilmirlər. Bu haqda bu gün, 27 aprel tarixində Bakuplus.az ATV-yə istinadən xəbər verir.
200 ailə və təqribən 800 nəfərin olduğu binanın sakinləri 18 ildir evlərinə çıxarış ala bilmirlər. Onlar aidiyyəti qurumlara müraciət etsələr də, heç kim onlara kömək etmir.
“Alanda dedilər ki, 1-2 aya çıxarış veriləcək. İndi də bizdən pul istəyirlər ki, bizim çıxarışımızı versinlər”, – deyə sakinlər şikayət edirlər.
Çıxarış olmadığından sakinlər sənədləşmə proseslərində ciddi problemlər yaşayırlar. Onların heç biri vacib sənədləri ala bilmir.
“Zaman-20” istehsalat müəssisəsinin nümayəndəsi, Adil adlı şəxs məsələ ilə bağlı bildirib ki, sakinlərin çıxarış ala bilməməklərinə səbəb binada havalandırma sisteminin olmamasıdır.
“Biz binanın tikintisinə 2007-ci ildə başlamışdıq. 4-5 il öncə isə yeni qanun çıxdı ki, binada havalandırma olmalıdır. İndi sakinlərlə birgə havalandırma sistemi yaratmalıyıq”, – deyə o qeyd edib.
Hüquqşünas Ramil Süleymanov deyir ki, əgər qanun tikintidən sonra qüvvəyə minibsə, MTK dövlətə müraciət edərək həmin qaydaların onlara şamil olunmamasına nail ola bilər. Əgər qanun tikintidən əvvəl qüvvəyə minibsə, bu zaman vətəndaşlar və MTK qarşılıqlı razılığa gəlməlidir.
