Binəqədi rayonu, 1-ci mədən, 42-ci korpus adlanan ərazidə kanalizasiya problemi var. Bu haqda bu gün, 5 aprel tarixində Bakuplus.az ARB-yə istinadən xəbər verir.
Söhbət Bünyad Sərdarov adına maşınqayırma zavodunun yaxınlığından gedir. Sakinlərin sözlərinə görə, ərazidə kanalizasiya sistemi olmadığından sakinlər ciddi əziyyət çəkirlər. Onlar suyun içində yaşamağa məcbur olurlar. Müvafiq qurumlar isə məsələni həll etmirlər.
“Nəmişlikdən üfunət bürüyüb. Maşın gətizdiririk 20-25 manata gəlib suyu çəkirlər. Döşəmələr çürüyüb gedir, dəfələrlə dəyişmişik. Mən ustaya nə qədər pul verəcəyəm?!”, -deyə sakin şikayət edirlər.
Kanalizasiya ilə yanaşı, ərazidə zibilləri toplayan da yoxdur. Bu da əlavə çətinliklər yaradır.
Binəqədi qəsəbə bələdiyyəsindən məsələ ilə bağlı bildirilib ki, sözügedən evlərin heç bir sənədi yoxdur.
“Bünyad Sərdarov adına zavod var idi, onun ərazisindən istifadə edirdilər, indi həmin zavod fəaliyyət göstərmir. Binəqədi ərazisində məhəllələr var ki, onların ana xəttə qoşulması ilə bağlı biz müraciət etmişik. Bizə söz veriblər ki, 2024-cü ilin sonunda həmin işlərə başlayacaqlar. Məişət tullantıları ilə bağlı biz vətəndaşlara dəfələrlə demişik ki, məişət konteynerlərinə ancaq gündəlik tullantıları ata bilərlər. Amma vətəndaşlar ev söküntüləri və yaxud ağac kəsimi zamanı onlardan istifadə edirlər. Plastmas qutular qoyuruq, yandırılır, dəmir qutular qoyuruq, təkərlərini açıb aparırlar. Vətəndaşlardan dəstək ala bilmirik. Yenə də həmin əraziyə əlavə maşınlar cəld edləcək və həmin məişət tullantıları oradan təmizlənəcək”, – deyə qurumdan qeyd edilib.
