Binəqədi rayonu, Fərid Məlikov məhəlləsi, 1E ünvanında şəxsi qarajın qanunsuz söküldüyü iddia olunur. Bu haqda bu gün, 6 mart tarixində Bakuplus.az Real TV-yə istinadən xəbər verir.
Qarajın sahibi Rzaağa Məmmədovun sözlərinə görə, 2006-cı ildə Binəqədi bələdiyyə sədri Natiq Məmmədova dövlət rüsumu ödəyərək sözügedən ünvandan qaraj alıb. 2019-cu ildə ərazidə abadlaşdırma işləri aparılarkən digər sakinlər kimi, Rzaağanın da köhnə qarajı sökülüb. Buna görə o məhkəməyə müraciət edərək qalib gəlib və bələdiyyədən qarajı yenidən tikmək tələb olunub.
“Özləri gəldilər ki, biz məhkəmənin qərarını 15 günə icra etməlidirlər. Məndə dedim ki, mənim imkanım yoxdur tikməyə. Onlar dedilər ki, özləri tikəcəklər. Ancaq sonra inşaya onların nəzarəti altında mən özüm başladım”, – deyə Rzaağa qeyd edib.
Bildirilir ki, tikinti işləri bitməmiş eyni qurum inşaya mane olmağa başlayıb və qarajı sökməyi tələb edib.
Binəqədi RİH-dən məsələ ilə bağlı vurğulanıb ki, Rzaağa Məmmədovun orada tikinti aparmaq hüququ yoxdur. Söküntü işləri isə sakinlərin müraciəti əsasında aparılıb.
“R.Məmmədov yaşadığı binanın qarşısında sakinlərin asudə vaxtlarını səmərəli keçirməsi üçün ayrılmış ərazidə avtomobil qarajı inşa etməyə cəhd göstərib”, – deyə Binəqədi RİH başçısı aparatında İctimai, siyasi və humanitar məsələlər şöbəsinin baş məsləhətçisi Leyla Quliyeva bildirib.
