Bakının kənd və qəsəbələri üzrə hərəkət edən avtobusların bəzisi qapısı açıq vəziyyətdə idarə edilir. Hazırda da paytaxtda qapıları bağlamadan avtobus idarə edən məsuliyyətsiz sürücülərin sayı kifayət qədərdir. Bu haqda bu gün, 22 avqust tarixində Bakuplus.az ATV-yə istinadən məlumat verir.
Bu kimi qanunsuzluğa yol verən, insanların təhlükəsizliyini düşünməyən avtobus sürücülərinin sayı az deyil. Əksər avtobus sürücüləri isə bunu nəqliyyat vasitəsinin köhnə olması və kondisionerin olmaması ilə izah edirlər.
Ancaq problem təkcə avtobusların qapısı açıq vəziyyətdə idarə olunması ilə bitmir. Sərnişinlər Bakı qəsəbələrinə işləyən bir sıra avtobusların həm texniki baxımdan nasaz, həm də natəmiz vəziyyətdə olmasından şikayətlənirlər.
Yerüstü Nəqliyyat Agentliyindən (AYNA) məsələ ilə bağlı bildirildi ki, marşrut xətləri müvafiq qanunvericiliyin tələblərinə uyğun olaraq, mərhələli qaydada müsabiqəyə təqdim edilir. Müsabiqənin şərtlərindən biri də avtobusların yenisi ilə əvəz olunmasıdır. Üstəlik sahibkarlarla keçirilən görüşlər zamanı onlara avtobusların yenilənməsi tövsiyə edilir.
Bakı şəhər Baş Polis İdarəsinin Dövlət Yol Polisi İdarəsindən isə bildirildi ki, nəqliyyat vasitəsinin qapısı açıq şəkildə sürülməsi təhlükəsizlik qaydalarına ziddir. Və buna görə həmin sürücünü 40 manat məbləğində cərimə gözləyir.
