Bakının mərkəzində, Fəvvarələr meydanı adlanan ərazidə iaşə obyekti tikilir. Bu haqda bu gün, 22 avqust tarixində Bakuplus.az “Kaspiy” qəzetinin baş redaktoru Vyaçeslav Sapunova istinadən məlumat verir.
Meydanda olan sütunların yaxınlığında metal konstruksiyalar və taxtalardan ibarət olan tikinti işləri aparılır.
“Parkların getdikcə daha çox “obyekt”lərlə zəbt edilməsi kimə lazımdır? Şəhərin piyada/gəzinti zonalarının ucsuz-bucaqsız “aynabəndlər”lə dolu olması kimə sərf edir? Axı onlar səkilərə və ya ağacların arasına sadəcə masa qoymurlar - əsaslı tikirlər, hasarlayırlar. Gəzinti üçün küçələr daha da daralır. Çətin ki belə hallar şəhər sakinlərinin ürəyincə olsun. Onsuz da fəaliyyətdə olan yüzlərlə ortabab, onlarla yaxşı restoran və kafelər onlara bəs edir.
Bu, həm sahibkarlara, həm də onlara şəhər torpaqlarını satanlara – paytaxtın görkəminə çoxdan biganə yanaşanlara, arabir onların şəhər mühitinə vurduğu ziyanı bəzən heç düşünməyənlərə lazımdır. Və təbii ki, bu barədə sakinlərin fikrini soruşmaq heç kimə lazım deyil”, - jurnalist paylaşımda yazıb.
Bakı Şəhər Memarlıq və Şəhərsalma Baş idarəsi bildirib ki, həmin ərazidə tikinti işləri dayandırılıb, Bakı Şəhər İcra Hakimiyyəti məsələ ilə bağlı məlumatlandırılıb. Yaranmış vəziyyət nəzarətə götürülüb.
