Sosial şəbəkələrdə saxta iş elanları verərək vətəndaşlara qarşı dələduzluq edənlərin peyda olduğu iddia edilir.
Bu barədə Bakuplus.az redaksiyasına müraciət edən Bakı sakini bildirib ki, uşaq bağçasında işə qəbul adı ilə 200 manatını mənimsəyiblər:
“Hər şeyi çox professional şəkildə edirlər deyə başa düşmək olmur. Mənimlə 3 xanım danışdı. İş şərtləri ilə tanış olduqdan sonra onlarla razılaşdım. Mənə “whatsapp”da əvvəlcə ilkin ödəniş etməli olduğumu dedilər. Buna görə göndərilən karta 200 manat atdım. Tək mən deyiləm. Bir neçə nəfəri də belə aldadıblar. Tanışımdan 400 manat alıblar. Daha sonra ortalıqdan yoxa çıxdılar”.
Zərərçəkmiş daha sonra dəfələrlə həmin şəxslərlə əlaqə saxlamağa çalışsa da, faydasız olub. Belə ki, onlar pulu aldıqdan sonra qarşı tərəfi bloklayıblar.
Şikayətçinin sözlərinə görə, onlar “Instagram”da “Ib_mektebeqeder_merkezi” adı altında fəaliyyət göstərirlər və ona göndərilən kart hesabı Mirnicat Əmirov adlı şəxsə məxsusdur.
Araşdırma zamanı məlum oldu ki, sözügedən şəxs bir neçə ay əvvəl də işə qəbulla bağlı saxta elanlarla insanları aldadıb və onların pul vəsaitlərini ələ keçirib. Buna görə də polis tərəfindən müəyyən olunaraq həbs edilib.
Məsələ ilə bağlı Daxili İşlər Nazirliyinə sorğu ünvanladıq.
Sara Məmmədli
