Son zamanlar sahibsiz itlərlə bağlı ardı-arası kəsilməyən şikayətlərdən biri də redaksiyamıza Xırdalandan ünvanlanıb.
Bakuplus.az-a müraciət edən Abşeron rayonu Xırdalan şəhəri sakinləri az qala hər addımbaşı üzləşdikləri dəstə-dəstə dördayaqlıların ciddi təhlükə mənbəyi olmaları ilə yanaşı antisanitar şərait və müxtəlif xəstəliklərə zəmin yaratmalarından narahatlıqlarını ifadə ediblər.
“Gərək faciə baş versin ki, səlahiyyətli şəxslər və qurumlar əlini ağdan qaraya vursun? Dəstə-dəstə Xırdalan və Masazır küçələrini dolaşan sahibsiz itlərdən nə vaxt qurtulacağıq? Nə vaxta qədər uşaqlarımızı məktəbə, dükana göndərəndə, hava qaralanda evdən çıxanda bu heyvanların hücumuna məruz qalıb-qalmamağımızla bağlı həyəcan və təlaş keçirəcəyik? Dəfələrlə deyilib, yazılıb, TV-lərdə süjetlər yayımlanıb, amma belə təsəvvür yaranır ki, sadə vətəndaşların təhlükəsizliyi heç bir məmuru, səlahiyyətli qurumu maraqlandırmır. Biz dərdimizi kimə deyək bəs?” - şikayətçi bildirib.
Sakinlər cavabdeh qurumlardan tez bir zamanda sahibsiz itlərlə əlaqəli yaranmış acınacaqlı vəziyyətin aradan qaldırılmasını tələb edirlər.
