Hacı Zeynalabdin Tağıyev adına Toxuculuq fabrikinin qəzalı yataqxanasında yaşayan sakinlər acınacaqlı vəziyyətdədirlər. Bu haqda bu gün, 29 dekabr tarixində Bakuplus.az Real TV-yə istinadən xəbər verir.
35 sakinin qaldığı binada məcburi köçkünlər və valideyn himayəsindən məhrum qalmış yeniyetmələr yaşayırlar.
Yataqxanada nəmişlikdən binanın beton qatları dağılır, armaturlar açıqda qaldığından paslanır, damlar deşik-deşikdir. Yağan yağışdan sonra suyun qarşısını almaq mümkün deyil. Elektrik xətləri isə ayrı məsələdir. Burada tez-tez qısaqapanma səbəbindən yanğınlar baş verir.
“Evimiz başımıza tökülür. Hamam, tualetə girməkdən qorxuruq, yağış yağan kimi pilləkənlərdən su axır. Aşağı düşmək və ya yuxarı qalxmaqdan qorxuruq”, - deyə sakinlər şikayət edirlər.
Sakinlərin sözlərinə görə, aidiyyəti qurumlar tərəfindən binaya baxış keçirilib və binanın qəzalı olduğu bildirilib. Ancaq heç kim sakinləri köçürmək üçün bir addım atmır.
Məcburi Köçkünlərlə İş üzrə Komitədən məsələ ilə bağlı bildirdilər ki, həmin sakinləri köçürmək hazırda mümkün deyil və işğaldan azad olunmuş torpaqlarda evlər tikildikdən sonra ilk növbədə onlar öz doğma yerlərinə göndəriləcəklər.
Xətai rayon İcra Hakimiyyətindən isə bildirdilər ki, binadan xəbərdardırlar və müvafiq qurumlara müraciət artıq göndərilib. Bir qərar qəbul edilərsə, müvafiq addımlar atılacaq.
[URIS id=85190]
