Maştağa qəsəbəsinin sakinləri M8 nömrəli marşrutun hərəkət intervalından narazıdırlar. Bu haqda bu gün, 7 iyul tarixində Qafqazinfo məlumat verib.
Şikayətçilərin sözlərinə görə, yay mövsümü gəldikdən sonra avtobusların sayı azalıb və sakinlər dayanacaqda 35-40 dəqiqə avtobus gözləməli olurlar.
“Qış aylarında vəziyyət indikindən qat-qat yaxşı idi. Düşünürdük ki, dərslər bitəndən sonra, məktəblilərin olmaması ilə əlaqədar, avtobusların içində boşluq olar. Lakin iyunun 14-dən, məktəblilərlə bərabər, sanki avtobusların sayını da azaltdılar. Yarım saat avtobus gözləyirik. M8 gəlib çıxanda da o qədər adam olur ki, tutub dayanmağa yer olmur. Təhlükəli vəziyyətdə gedib-gəlirik. Sürücülər qanunsuz olaraq avtobusun arxa qapılarını da minənlər üçün açırlar. 60-70 nəfər tutumu olan avtobuslarda 200 adam daşıyırlar”, - deyə sərnişinlər bildiriblər.
Bakı Nəqliyyat Agentliyinin (BNA) mətbuat xidmətinin rəisi məsələyə aydınlıq gətirib. Qurumdan bildirilib ki, bu vəziyyətin baş verməsinə səbəb nəqliyyat sıxlığıdır: “BakuBus”-ın istismarında olan M8 xətti üzrə gündəlik olaraq xəttə 10 avtobus çıxarılır. Bu marşrut xətti üzrə avtobuslararası interval, qrafikə əsasən, 15 dəqiqə olmalıdır. Lakin Heydər Əliyev prospekti və Zabrat şosesində müşahidə olunan nəqliyyat sıxlıqlarına görə interval 20-25 dəqiqəyə qədər artır”.
