"Şimal" Elektrik Stansiyasının fəaliyyəti dayandırıla bilər. Bu haqda bu gün, 20 oktyabr tarixində Bakuplus.az Report-a istinadən xəbər verir.
Paytaxtın Xəzər rayonu, Şüvəlan qəsəbəsində yerləşən stansiya Bakının 40%-ni elektrik enerjisi ilə təmin edir.
"Xəzər dənizində son 20 ildə suyun səviyyəsinin 2 metrə yaxın aşağı düşməsi stansiyanın fəaliyyətinə ciddi təhlükə yaradıb”, - "Azərenerji" ASC-nin ictimaiyyətlə əlaqələr və media mərkəzinin rəisi Teymur Abdullayev bildirib.
Bunun qarşısını almaq üçün Xəzər dənizinin içərisinə doğru 540 metr uzunluğunda estakadanın və 2 yerdə su nasos stansiyalarının tikintisinə başlanılıb. Yeni infrastrukturun köməyi ilə Xəzər dənizindən soyuq suyun 8 metr dərinlikdən götürülməsinə imkan yaradılacaq.
