Binəqədi rayonunun Rəsulzadə qəsəbəsində yollar işıqlandırılmır.
Bakuplus.az xəbər verir ki, bununla bağlı sakinlər məlumat yayıb.
Məlumata görə, Süleyman Sani Axundov küçəsi və Binəqədi şosesinin kəsişməsindəki parkda Çingiz Aytmatovun abidəsi qoyulduqdan sonra ərazi qismən işıqlandırılsa da, vəziyyət yenə də ürəkaçan deyil.
Sakinlərdən birinin sözlərinə görə, Bakı Miqrasiya Xidmətinin yerləşdiyi küçədə ümumiyyətlə işıq dirəkləri yoxdur və yollar qaranlıqdır:
“Parlaq görünən bina Binəqədi rayon İcra Hakimiyyətidir. Bura isə avtomobillərin sürətlə keçdiyi yoldur. Bu yol axıra qədər təhlükə mənbəyidir. Çünki yol heç bir halda işıqlandırılmır. Buna görə də sürücülər piyadaları görmür. Məhəlləyə, evə gedənlər yuxarı qalxaraq bu yoldan istifadə edirlər. Ancaq gördüyünüz kimi bu yollar da qaranlıqdır. Sağ olsun, kimsə öz qapısının ağzına işıq qoyub. Görürsünüz, hər gün necə yollarla gedirik”.
Şikayətçilərdən biri bildirib ki, sözügedən yol Binəqədi rayon İcra Hakimiyyətinə çox yaxındır.
“İcra Hakimiyyəti yollara baxmır. Bu yollar ancaq qonaq gələndən gələnə işıqlandırılır. Ancaq İcra Hakimiyyətinin binasına baxın. İnsanlar zülmətdə yaşayarkən onlar mənasız binalarını necə işıqlandırıb. Halbuki, o işıq yollara verilməlidir”, - deyə sakinlərdən biri qeyd edib.
