Artıq iki gündür respublika ərazisində hava şəraiti kəskin dəyişib. Ötən gecədən başlayaraq intensiv yağış yağmağa başlayıb. Bunun nəticəsində paytaxtın bir sıra küçə və prospektlərini, eyni zamanda körpüləri su basıb. Maşınlar su altında qalıb.
Bununla yanaşı sosial şəbəkələrdə idman zallarından birinin də su altında qaldığını görürük.
Xatırladaq ki, subasmaya məruz qalan yerlərdən biri də ötən ilin oktyabrında iki nəfərin boğularaq öldüyü Sabunçu rayonu ərazisindəki tuneldir.
Bəs görəsən, güclü yağışlar nəticəsində su basqınları və əmlaka dəyən zərər – kompensasiya kim tərəfindən ödənilir?
Mövzu ilə bağlı Bakuplus.az-a açıqlama verən təhlükəsizlik məsələləri üzrə ekspert Elmar Nurəliyevin sözlərinə görə, insanlar təbii fəlakətlər, təbiət hadisələri və fövqəladə vəziyyət olan zamanı təhlükəsizliklərini necə təmin etməli olduqlarını bilməlidirlər:
“Belə hallarda vətəndaş hara təxliyə olunacağını və hansı quruma müraciət etməli olduğunu bilməlidirlər. Təhlükə ilə üzləşəndə nə etməli olduqlarını öyrənməlidirlər. Hər kəsin ən azından ilkin məlumatı olmalıdır. Lüzum olmadığı təqdirdə səfərlərini təxirə salmalı və evdən çölə çıxmamalıdırlar.
Güclü yağışlar leysan, çay daşması və s. yaradır. Bu kimi hallardan qorunmaq üçün insanlar yaşadıqları evin xarakteristikasına uyğun davranmalıdırlar. Hansı təhlükə riskləri olacağından öncədən məlumatlı olmalıdırlar.
Sürüşmə zonasıdırsa, sürüşmə baş verə bilər. Təhlükə risklərinə qarşı öncədən də hazırlıq planları olmalıdır. Azyaşlı şəxsləri və yaşlıları tək qoymaq olmaz. Təhlükəni önləmək üçün müəyyən tədbirlər həyata keçirməlidirlər. Hər bir vətəndaş davranış qaydalarını bilməlidir”.
Hüquqşünas Şamil Paşayev isə qeyd edib ki, vətəndaş öz əmlakını, obyektini sığortalamayıbsa, qanunvericilik kompensasiyanı tənzimləmir:
“Təbii fəlakət və ya hər hansı bir hadisə nəticəsində şəxslərin əmlakına, evinə, biznesinə ziyan dəyə bilər. Bu ziyanı qarşılamaq üçün ölkədə sığorta sistemi tətbiq olunmalıdır. Sığorta Agentlikləri tərəfindən öz əmlaklarını, bizneslərini sığorta etməlidirlər. Belə olanda vurulan ziyana görə sığorta şirkətləri vətəndaşlara ödəniş həyata keçirir. Vətəndaş öz əmlakını, obyektini sığortalamayıbsa, qanunvericilik kompensasiyanı tənzimləmir.
Ona görə də insanlar sahib olduqları əmlak və obyektləri sığortalamalıdırlar ki, belə hallar baş verəndə sığorta şirkətləri kompensasiyanı ödəsin”.
Nəzrin Vahid
