Ötən ay Kliniki Tibbi Mərkəzə zəhərlənmə ilə bağlı müraciət edənlərin sayı açıqlanıb. Bu haqda bu gün, 4 iyul tarixində Bakuplus.az tibb müəssisəsinə istinadən xəbər verir.
Verilən məlumata əsasən, iyun ayı ərzində Kliniki Tibbi Mərkəzə 683 nəfər müraciət edib. Onlardan 105-i xəstəxanaya yerləşdirilib.
Həmin xəstələrdən 37-si dərmandan, 24-ü sirkə turşusundan, 3-ü dəm qazından zəhərlənib. Həmçinin 10-u etanol, 5-i anaflaksiya, 6-sı allergik reaksiya, 1-i botulizm, 17-si ilan sancması, 2-si arı sancması səbəbindən xəstəxanaya yerləşdirilib. Zəhərlənən şəxslərin 51-i qadın, 43-ü kişi, 11-i isə uşaq olub.
Həkimlərin səylərinə baxmayaraq, 3 nəfər sirkə turşusundan, 2 nəfər etanoldan, 1 nəfər dərmandan, 1 nəfər anafilaktik şokdan dünyasını dəyişiblər. Onlardan 5-i kişi, 2-si isə qadındır.
