Aprelin 1-də Bakıda Azərbaycan Dövlət Akademik Opera və Balet Teatrında görkəmli opera ifaçısı, SSRİ Xalq artisti Lütfiyar İmanovun (1928-2008) anadan olmasının 95 illiyinə həsr olunmuş “Koroğlu” operasının nümayişi keçiriləcək. Bu haqda bu gün, 30 mart tarixində Bakuplus.az teatrın mətbuat xidmətinə istinadən məlumat verir.
Lütfiyar İmanov uzun illər Opera və Balet Teatrının solisti olub, onun səhnəsində canlı və yaddaqalan obrazlar yaradıb.
SSRİ Xalq artistinin Üzeyir Hacıbəylinin “Koroğlu” operasında təcəssüm etdirdiyi obraz onun yaradıcılığında xüsusi yer tuturdu.
Tamaşada Koroğlu rolunu Xalq artisti Samir Cəfərov, Nigar obrazını Əməkdar artist İlahə Əfəndiyeva ifa edəcəklər. Tamaşada Əməkdar artistlər Cahangir Qurbanov (Qəsən Xan) və Tural Ağasıyev (Qəmzə bəy), solistlər Mahir Tağızadə, Fəhmin Əhmədli, Taleh Yahyayev, Aytən Məhərrəmova və başqaları iştirak edəcəklər.
Tamaşanın quruluşçu rejissoru Əməkdar incəsənət xadimi Hafiz Quliyev, dirijoru Əməkdar artist Əyyub Quliyev, xormeysteri Əməkdar incəsənət xadimi Sevil Hacıyevadır.
Biletlər teatr və şəhərin kassalarından, həmçinin onlayn əldə etmək mümkündür.
