Bakıda İran səfirliyinin yaxınlığında, Axundov bağında “Müsavat” partiyası tərəfindən aksiya keçirilir. Bu haqda bu gün, 15 noyabr tarixində AzFront Telegram kanalı məlumat verib.
Etiraz aksiyası İranda nümayişçilərin cəzalandırılmasına və anti-Azərbaycan siyasətinə qarşı keçirilir.
Aksiyanın icazəsiz olduğu bildirilir, saxlanılanlar var. Səfirliyin qarşısındakı küçə bağlanıb.
Aksiyanın keçiriləcəyini ilk elan edən “Müsavat”ın fəalı Tofiq Yaqublu hadisə yerinə gəlməyib.
Daha öncə məlum olub ki, iranlı siyasi şərhçi Həmid Babai xəbərdarlıq edib ki, “Müsavat” partiyası İranın Bakıdakı səfirliyi qarşısında aksiya keçirsə, dərhal aşağıdakı cavab tədbirləri görüləcək. O, həmin gün Tehranda mitinq keçirəcəyini və Azərbaycan səfirliyinə daş atacağını vəd edib. İrana daxil olan yük maşını sürücülərinə qarşı da hədələr edilib. Babainin sözlərinə görə, aksiyadan sonra azərbaycanlı sürücülər öldürüləcək, nəqliyyat vasitələri isə tutularaq yandırılacaq.
Yenilənib: 16:15
Müxalif “Müsavat” partiyasının İranın Bakıdakı səfirliyi qarşısında təşkil edtiyi aksiya yekunlaşıb. Bünyad Sərdarov küçəsində nəqliyyatın hərəkəti tam bərpa olunub.
