Bakıda “Məlhəm” klinikasında həkim səhvi ucbatından ölüm halı baş verdiyi iddia olunub.
Bakuplus.az xəbər verir ki, bununla bağlı sosial şəbəkələrdə görüntülər yayılıb.
Məsələ ilə bağlı klinikaya sorğu ünvanlanıb.
Sorğuya cavab olaraq bildirilib ki, 29.05.2025-ci il tarixində sosial şəbəkələrdə səhər saatlarında “Məlhəm Beynəlxalq Hospital” MMC-də vəfat etmiş 22.09.1968-ci il təvəllüdlü Soltanov Şahid Maqsud oğlu barəsində heç bir hüquqi və faktiki əsası olmayan, yalan, həqiqətə uyğun olmayan və hospitalın işgüzar nüfuzunu ləkələyən məlumatlar yayılmaqda davam etdiyindən baş vermiş ölüm hadisəsinin obyektiv səbəblərinin ictimaiyyətin diqqətinə çatdırılmasına zərurət yaranıb.
Bildirilib ki, 22.09.1968-ci il təvəllüdlü Soltanov Şahid Maqsud oğlu 17.05.2025-ci il tarixində şiddətli qarın ağrısı və bulantı-qusma şikayətləri ilə Hospitalın Təcili Yardım Şöbəsinə daxil olub:
“İxtisaslı həkim müayinəsindən sonra ona XBT10 kodu üzrə K85.8 “Digər kəskin pankreatitlər”, R65.3 “Orqan çatışmazlığı ilə qeyri-infeksion mənbəyə qarşı ümumi iltihablı cavab reaksiyası sindromu” əsas diaqnozlar qoyulmuşdur. Ş.M.Soltanovda E11.0 “İnsulindən asılı olmayan şəkərli diabet” və I10 “Essensial (birincili) hipertenziya” yanaşı gedən xəstəliklər olub.
Xəstə “Məlhəm Beynəlxalq Hospital” MMC-yə daxil olduqdan sonra stasionar şöbəyə yatırılmış və müvafiq müalicələrə başlanılıb. 22.05.2025-ci il tarixində xəstənin klinik vəziyyəti ağır olduğundan konsilium təşkil olunmuş və mövcud vəziyyətlə bağlı müalicəsi davam etdirilmişdir. KT müayinəsi zamanı Ş.M.Soltanovda sol tərəfli plevral maye və 40-50% nekrotizan pankreas toxuması aşkar olunub. Xəstənin vəziyyəti 23.05-28.05.2025-ci il tarixləri arasında ağır olub”.
Klinikadan bildirilib ki, 29.05.2025-ci il tarixində saat 07:03 radələrində xəstədə kardiak arrest izlənmiş və CPR başlanıb:
“Xəstə intubasiya olunaraq süni tənəffüs aparatına qoşulmuş və qapalı ürək masajı olunaraq reanimasiya şöbəsinə gətirilmişdir. 50 dəqiqə ərzində bütün reanimasiya tədbirlərinin həyata keçirilməsinə baxmayaraq saat 07:53 radələrində bioloji ölüm baş verib. Xəstəyə tibbi yardım göstərilən bütün müddət ərzində bu və ya digər tibbi və ya texniki qüsura yol verilməyib”.
Həmçinin o da qeyd edilib ki, nekrotizan pankreatit ölüm ehtimalı yüksək olan xəstəlikdir.
