Paytaxtın Nəsimi rayonu, Mərdanov qardaşları küçəsində tarixi binanın fasadı bərpa olunmur. Bu haqda bu gün, 22 noyabr tarixində Bakuplus.az Oxu.az-a istinadən xəbər verir.
Bir neçə ay öncə adıçəkilən küçədə yerləşən XIX əsrə aid binanı restorana çevirmək məqsədilə fasadının kəsilməsi barədə məlumat verilmişdir.
Həmin vaxt rəsmi qurumlar məsələni həll edəcəklərini bildirsələr də, sakinlər yenidən şikayət edirlər. Onlar tarixi binaya vurulan ziyandan və restoranda işçilər üçün ayrılan girişin antisanitar vəziyyətindən narazıdırlar.
“Əraziyə siçanlar doluşur. Natəmizliyin qarşısını ala bilmirik. Tarixi binanın pəncərələrini qapı ediblər, heç kim bir söz demir. Amma biz binanın bir kərpicinə toxunsaq, hamımızı köçürərlər”, - deyə sakinlər əlavə ediblər.
Mədəni irsin Qorunması, İnkişafı və Bərpası üzrə Dövlət Xidməti məsələ ilə bağlı bildirib ki, hazırda hüquq-mühafizə orqanları ilə birgə iş aparılır.
