Bakıda işdən çıxarılan həkim-reanimatoloqlar həkim-infeksionist vəzifəsinə keçiriliblər. Bu haqda Azərbaycanın İnsan Hüquqları üzrə Müvəkkili (Ombudsman) Səbinə Əliyeva 2022-ci il üzrə illik məruzəsində bildirib.
Nizami Tibb Mərkəzinin 1 saylı Uşaq Yoluxucu Xəstəlikləri Xəstəxanasının həkim-reanimatoloqları Ombudsmana müraciət edərək bildiriblər ki, müəssisənin TƏBİB-in tabeliyinə verildiyi üçün onlardan işdən çıxmaları və “Nizami Tibb Mərkəzi” publik hüquqi şəxsinə işə qəbul olunmaları barədə ərizə yazmaları tələb olunub. Lakin daha sonra məlum olub ki, həkimlər uyğun vəzifəyə təyin olunmayıblar.
Şikayətlə bağlı TƏBİB-ə ünvanlanmış müraciətdən sonra Səhiyyə Nazirliyinin 01.09.2008-ci il tarixli 119 nömrəli əmrinə dəyişiklik edilməsi barədə 03.06.2015-ci il tarixli 42 nömrəli əmrinə uyğun olaraq, “Nizami Tibb Mərkəz”ində çalışan on bir anestezioloq-reanimatoloq təhsil sənədlərinə və sertifikasiya şəhadətnamələrinə uyğun olaraq, həkim-infeksionist vəzifəsinə keçirilib.
