“Skuterlər, velosipedlər və onları idarə edən, insanların üstünə şütüyən məxluqların əlindən bulvarda addım atmaq mümkün deyil”, - bunu öz İnstagram səhifəsində bu gün, 13 iyul tarixində müğənni Nura Suri yazıb.
Onun sözlərinə görə, bulvarda kənardan gələn şəxsə bir stəkan çay belə satmağa icazə verilməyəcək.
“Skuterlər yenə icarəyə verilir (guya qadağan olunmuşdu). Qoyulan qadağa işarələrinə baxan yoxdur.
Deməli, Bakıda dənizi zəbt edib pul qazanırlar, hər yerdə pullu çimərliklərdi, bulvarda kafe əlindən yer yoxdur, bunlar yetməyib, skuterdən də qazanırlar.
İnsanlar nə etsin? Kasıblar yaşamasın bu şəhərdə? Bakını Dubay kimi varlılar şəhəri edin, kasıbları göndərin başqa yerdə yaşasınlar”, - müğənni davam edib.
Dənizkənarı Milli Parkın mətbuat katibi Əfsanə Mehdiyeva bu ittihamları şərh edərkən bildirib ki, idarəyə vətəndaşlardan çoxsaylı şikayətlər daxil olduğu üçün əvvəllər bulvar boyunca skuterlərin hərəkətinə qadağa qoyulub. Bu haqda məlumatı Caliber.az paylaşıb.
“Ancaq daha sonra skuterlər sürənlərdən şikayətlər gəldi. Biz hansısa güzəştə getməyə çalışdıq. Hər kəsin bulvarda rahat qalmaq hüququ var. Hazırda skuterlərin yalnız bulvarın müəyyən yerlərində və saatda 17 kilometrdən çox olmayan sürətlə idarə olunmasına icazə verilir.
Bulvarda skuter icarəyə götürənlər bu tələblərlə bağlı təlimatlandırılıblar. Skuterlərdə sürət məhdudlaşdırıcıları var. Amma kənardan gələn skuter sürənlər qaydaları pozurlar. Onlara xəbərdarlıq edirik, nəzarəti gücləndirdik. Amma skuter istifadəçiləri də sürərkən məsuliyyətli və diqqətli olmalıdırlar”, - deyə Mehdiyeva vurğulayıb.
[video width="1920" height="1080" mp4="https://bakuplus.az/storage/photos/2023/07/suri.mp4"][/video]
