Bakının bir sıra rayonlarında içməli suyun verilməsində problemlər yaranıb. Xüsusilə Nərimanov, Suraxanı və bir çox rayonlarda su saat 11:00-dan 19:00-a qədər kəsilir. Su ancaq fasilələrlə və günün müəyyən saatlarında qrafik üzrə verilir. Buna səbəb Bakını içməli su ilə təmin edən mənbələrdəki problemdir. Bu haqda bu gün, 28 fevral tarixində Bakuplus.az Bizim.Media-ya istinadən məlumat verir.
“Azərsu” ASC-nin mətbuat katibi Anar Cəbrayıllının sözlərinə görə, Taxtakörpü-Ceyranbatan su anbarında ehtiyatlar azalıb:
“Əhaliyə su Oğuz-Qəbələ -Bakı su kəməri ilə verilir. Su anbarları ehtiyatlarını toplamaq üçün bəzi ərazilərdə gündüz və ya gecə saatlarında suyu dayandırırıq. Suraxanı və Xətai istiqamətinə su anbarlarından gecə saat 23:00-dan sonra çıxışı azaldırıq və səhər tezdən güclü nasosları qoşub insanlara su veririk. Məsələn, Günəşli qəsəbəsinin “D” massivi 24 saat su alırdı, indi günorta saatlarında həmin ərazidə suyu dayandırırıq. Tənzimlənən ərazilərimiz var”, - qurumun nümayəndəsi bildirib.
Ötən ilin noyabrında “Azərsu” ASC-nin mətbuat katibi Anar Cəbrayıllı bildirmişdi ki, Taxtakörpü su anbarının yaradılması və Taxtakörpü-Ceyranbatan su kəmərinin çəkilişi ilə Bakı şəhərinə dayanıqlı su verilib. O, bəyan edib ki, bu kəmər yaxın bir neçə onillikdə Bakının içməli suya artan tələbatını ödəyə bilər.
Lakin 3 aydan sonra ictimaiyyətə yenə bildirilib ki, Taxtakörpü-Ceyranbatan su anbarında ehtiyatlar azalıb.
