Bakıda bəzi avtobus sürücüləri sükanın arxasında olarkən gündəlik məsələləri telefonla həll edirlər. Bu haqda bu gün, 3 iyun tarixində Bakuplus.az Xəzər Xəbər-in reportajını təqdim edir.
12 və 51 saylı marşrut xətləri üzrə işləyən avtobuslarda qeydə alınan videokadrlarda sürücülər yol boyu telefonları əllərindən buraxmırlar. Eyni vaxtda onlar həm nəqliyyat vasitəsini idarə etməyi, həm pul xırdalamağı, həm də vətəndaşlara yol göstərməyi bacarıblar.
51 nömrəli avtobusların aid olduğu daşıyıcı şirkətin direktoru Qalib Salahov bildirib ki, lentə alınan sürücü Novruz Musayevə töhmət verilib.
12 nömrəli avtobusların aid olduğu daşıyıcı şirkətin rəhbəri Fikrət Əhmədov isə suala cavab verməyib.
Bakı Nəqliyyat Agentliyinin (BNA) əməkdaşının sözlərinə görə, sürücülərin sükan arxasında telefondan istifadə etməsi qanun pozuntusu olmaqla yanaşı, təhlükəsizlik baxımından da risk yaradır. Buna görə də sözügedən marşrut xətləri üzrə daşıyıcılara agentlik tərəfindən xəbərdarlıq ediləcək.
