Noyabrın 29-dan dekabrın 3-dək Bakıda “Azerbaijan Fashion Week - 2023” adlı moda həftəsi baş tutacaq. Bu haqda bu gün, 28 noyabr tarixində Bakuplus.az Azərtac-a istinadən xəbər verir.
Layihə milli brendlərin yerləşdirilməsi və təbliğinə yönəlib. Tədbir fərqli moda dizaynerlərini, yerli və xarici media nümayəndələrini və moda sənayesinə yaxın olan digər mütəxəssisləri əməkdaşlığa cəlb edəcək.
Moda dünyasındakı sürətli dəyişiklikləri nəzərə alaraq, moda həftəsində “Azerbaijan Fashion Forward” müsabiqəsinin təqdimatı olacaq. Əlavə olaraq tanınmış modelyer Orxan Sultan gənc modelyerlər üçün master-klas keçirəcək. Tədbir dekabrın 2-də saat 12:00-da “Creative hub” Təhsil-İnkubasiya Mərkəzində keçiriləcək.
Tədbir dekabrın 3-də saat 19:00-da “The Ritz Carlton” hotelində 15-ci Yubiley moda nümayişi ilə başa çatacaq.
Podiumdakı kolleksiyaları Rusiya, Gürcüstan, Özbəkistan, Türkmənistan, Qazaxıstan və Qırğızıstan kimi ölkələrdən olan dizaynerlər təqdim edəcəklər.
Tədbir Azərbaycan Mədəniyyət Nazirliyinin dəstəyi ilə "Yaradıcı Həftə" çərçivəsində təşkil olunur.
