İctimai nəqliyyatla bağlı hələ də həllini gözləyən problemlər var. Vətəndaşlar bəzən saatlarla avtobus gözləməli olurlar. Bəzi avtobuslar gec gəlir. Nəticədə sərnişinlər mənzil başına vaxtında çata bilmirlər. Problem Milli Məclisdə də gündəmə gətirilib. Bu haqda bu gün, 21 iyun tarixində Bakuplus.az ATV-yə istinadən məlumat verir.
Millət vəkili Azay Quliyev növbədənkənar plenar iclasda problemə diqqət çəkib.
“Elə yaşayış massivləri var ki, orada, ümumiyyətlə, marşrut xətləri işləmir. Binəqədi rayonu 6-cı mikrorayonda seçicilər dəfələrlə mənə müraciət ediblər. Marşrut avtobusları yaşayış massivinə qədər gedib çıxmır. Çünki sahibkarlar onu qeyri-qənaətbəxş hesab edirlər, gəlirin az olduğunu qeyd edirlər. Belə çıxır ki, sahibkar burada az vəsait əldə edəcək deyə, insanlar kilometrlərlə yolu qət etməlidirlər”, - deputat deyib.
Problemlə bağlı Azərbaycan Yerüstü Nəqliyyat Agentliyindən (AYNA) bildirildi ki, ictimai nəqliyyatın inkişafı, əlçatanlığı və xidmət keyfiyyətininin artırılması məqsədilə layihələr hazırlanır.
“Aparılan təhlillər də onu göstərir ki, xüsusən günün pik saatlarında yollarda müşahidə olunan nəqliyyat sıxlıqları səbəbindən müntəzəm marşrut avtobusları arasında intervallar artır. Bu məqsədlə müntəzəm marşrut xətləri üzrə avtobusların sayının artırılması, onların səmərəli fəaliyyətinin təşkili, eləcə də sərnişinlər üçün daha cəlbedici olması üçün xüsusi zolaqların təşkili və nəzarətin gücləndirilməsi ilə bağlı konkret təkliflər hazırlanır”, - deyə AYNA-nın mətbuat katibi Tural Orucov bildirib.
O, həmçinin qeyd etdi ki, layihə həyata tam keçirildikdən sonra nə dayanacaqlarda saatlarla gözləyən olacaq, nə də marşrut xəttinin azlığından şikayət edən.
