Paytaxtın Sabunçu rayonu, Pirşağı qəsəbəsi, 2-ci Sovxoz ərazisinin problemləri bitmir. Bu haqda bu gün, 11 fevral tarixində Bakuplus.az APA-ya istinadən xəbər verir.
Kanalizasiya sistemi yararsız hala düşüb, çirkli sular küçələrə axır. Bundan əlavə, 2015-ci ildə inşa olunan poliklinika fəaliyyət göstərmir, 283 saylı bağçanın binası isə baxımsız haldadır.
20-30 uşağın getdiyi bu müəssisə hər an uça bilər, pəncərələr sınmış vəziyyətdədir.
Təhsil Nazirliyi məsələ ilə bağlı bildirdi ki, bağçalar onların səlahiyyətinə təzəlikcə verilib və sıra ilə bu cür müəssisələrə baxış keçiriləcək.
Ərazidə yerləşən poliklinikanın darvazasına isə ümumiyyətlə qıfıl vurulub. Tibb işçiləri yaxınlıqda yerləşən köhnə tikilidə məskunlaşıblar.
Səhiyyə Nazirliyi tərəfindən poliklinikaların TƏBİB-in səlahiyyətində olduğu deyilib, sonuncudan isə bildirilib ki, məsələnin həlli Səhiyyə Nazirliyindən asılıdır.
Dağılmış kanalizasiyaya gəldikdə isə, “Azərsu” ASC-nin mətbuat katibi Anar Cəbrayıllı bildirdi ki, ərazidə mərkəzləşdirilmiş sistem mövcud deyil. Qəza briqadası artıq əraziyə göndərilib.
