Binəqədi rayonunun el arasında “Nihad” market kimi tanınan ərazisində yaşayan sakinlər piyada zolağının olmaması ilə bağlı şikayətçidirlər. Daha doğrusu, zamanla boyası gedən zolağın yerində vaxtilə çəkilən xətlərin izi qalmayıb. Bu haqda bu gün, 21 dekabr tarixində Bakuplus.az İTV-yə istinadən məlumat verir.
Sakinlər deyirlər ki, ərazidə birtərəfli piyada keçidi nişanı var. Amma sürüclər nə nişana, nə sürət həddinə, nə də piyadanın keçməsinə məhəl qoyurlar. Ən təhlükəli məqam isə yaxınlıqda məktəbin yerləşməsi səbəbindən bu yoldan, əsasən, uşaqların istifadə etməsidir. Ətrafda işıqforun və dayanacağın olmaması işi daha da çətinləşdirir.
Məsələ ilə bağlı Azərbaycan Yerüstü Nəqliyyat Agentliyindən (AYNA) bildirilib ki, əməkdaşlar tərəfindən əraziyə baxış keçiriləcək. Hər hansı çatışmazlıq aşkarlanarsa, müvafiq tədbirlər görüləcək.
