Fevralda Türkiyəyə yardım olaraq yorğan-döşək və digər humanitar yardımları köhnə qırmızı avtomobilində aparan Sərvər Bəşirliyə ev söz verilib. Bu haqda bu gün, 3 mart tarixində Milli.az məlumat verib.
Daha öncə ona yeni avtomobil hədiyyə edən türkiyəli iş adamı Sebahettin Civelek Bakıya gəlib. Bildirilir ki, onun təşəbüssü ilə Sərvər Bəşirlinin yaşadığı həyətdə ikimərtəbəli ev tikiləcək.
"Sərvər Bəşirlinin icazəsi ilə ona yaxın günlərdə ev tikəcəyik. Artıq evin əsası qoyulub. İnşallah, tezliklə tikiləcək yeni evdə Sərvər Bəşirli ilə çay içəcəyik. Bu cür qardaşı olan millətin kürəyi heç vaxt yerə gəlməz. Azərbaycan və Türkiyə hər zaman - acı gündə də, sevincli gündə də bir-birinin yanında olub. Türkiyədə baş verən dəhşətli zəlzələdən sonra Azərbaycan dərhal öz qardaşının yanına qaçdı, o cümlədən Sərvər Bəşirli... Buna görə də ona dəstək olmağı özümə bir qardaş borcu bildim. Allah bir daha Türkiyəyə acı yaşatmasın", - deyə Civelek vəd edib.
Bəşirli və ailəsi bu dəstəyə görə öz təşəkkürlərini bildiriblər.
Həmçinin teleaparıcı Tarix Əliyev Sərvər Bəşirliyə efirdə 10.000 manat köçürüb və qeyd edib ki, ev tikildikdən sonra ona mebellə təminatda köməklik edəcək.
Sərvər Bəşirli 1989-cu ildə Laçın rayonunun Minkənd kəndində anadan olub. Hazırda Abşeron rayonu, Ceyranbatan qəsəbəsində fərdi evdə yaşayır.
