Paytaxtın Nizami rayonu, Keşlə qəsəbəsi, NZS yaşayış massivi, Yavər Səfərov, 30 ünvanında yaşayan 20 sakinin evləri yararsız vəziyyətə düşüb. Bu ərazidən keçən qatarlar da onların yaşayışını çətinləşdirir. Əhalinin köçürülməsi üçün əlaqədar nazirliklərin rəyi olsa da, onların şikayətlərinə qulaq asan yoxdur. Bu haqda bu gün, 22 dekabr tarixində Bakuplus.az Xəzər Xəbər-ə istinadən məlumat verir.
Ərazidə yaşayan sakinlər iddia ediblər ki, onları yaşadıqları ərazidən köçürmək əvəzinə məhkəməyə veriblər.
“2009-cu ildə FHN bura baxış keçirib. Evlərin qəzalı vəziyyətdə olması, sakinlərin köçürülməsi barədə akt tərtib ediblər. Bu akt nəticəsində Bakı şəhəri Nizami Rayon İcra Hakimiyyəti müvafiq qurumlara kompensasiya ayrılmasına görə müraciət edib. Lakin son nəticədə Azərbaycan Dəmir Yolları (ADY) bizi məhkəməyə verib ki, bu evlər özbaşına tikililərdir”, – deyə sakinlərdən biri deyib.
Sakinlər ADY-nin bu fikri ilə razılaşmırlar. Onların sözlərinə görə, bu evlər Sovetlər İttifaqı vaxtında, ötən əsrin 50-ci illərində tikilib.
Sakinlər bununla bağlı Maliyyə Nazirliyinə müraciət ediblər. Nazirlikdən verilən cavab məktubunda ərazidən 4 ailənin köçürülməsi üçün onlara birdəfəlik kompensasiyaların verilməsinin Bakı Şəhər İcra Hakimiyyətinə (ŞİH) həvalə olunduğu qeyd olunub. Bakı ŞİH isə qərarın icra olunmasını “Azərbaycan Dəmir Yolları” Qapalı Səhmdar Cəmiyyətinə yönləndirib.
"Azərbaycan Dəmir Yolları" QSC-dən bildirilib ki, qeyd olunan ərazidə özbaşına tikilmiş qeyri-qanuni evlər dəmir yolları ilə daşınan strateji yüklərin təhlükəsiz daşınmasına ciddi maneə yaradır. Evlərin kanalizasiya xətləri və çirkab suları birbaşa dəmir yolları xətlərinə axıdılır. Qeyri-qanuni tikilmiş bu evlərin sökülməsi ilə bağlı məhkəməyə müraciət olunub. Məhkəmənin verdiyi qərardan asılı olaraq bu evlər haqında müvafiq qaydada tədbir görüləcək. Azərbaycan Dəmir Yollarının onun mühafizə zolağını zəbt edərək tikilmiş qeyri qanuni evlərin sakinləri üçün hər hansı kompensasiya ödəmək kimi hüquqi öhdəliyi yoxdur.
