Suraxanı rayonu Yeni Günəşli V massivi, bina 21-in sakinlərinin yaşadıqları əraziyə qanunsuz avtoyuma məntəqəsinin quraşdırılması ilə bağlı məlumat vermişdik.
Qafqazinfo.az xəbər verir ki, polis əməkdaşları tərəfindən həmin qanunsuz avtoyuma məntəqəsinin götürülməsi təmin edilib.
DİN-in Mətbuat xidmətindən bildirilib ki, qanunsuz hərəkətlərlə bağlı tədbirlər görülür və sakinlərin müraciəti nəzərə alınaraq avtoyuma məntəqəsi üçün qurulan konstruksiya ərazidən uzaqlaşdırılıb: “Faktla bağlı Cinayət Məcəlləsinin 188-ci (Torpaq üzərində mülkiyyət, istifadə və ya icarə hüququnu pozma) maddəsi ilə iş başlanıb. Hazırda istintaq hərəkətləri davam etdirilir”.
Qeyd edək ki, avtoyuma məntəqəsinin həmin əraziyə özünü qazi kimi təqdim edən bir qrup şəxs tərəfindən yerləşdirildiyi bildirilirdi.
***
09:22
“Binamızın həyətində uşaqlar üçün park inşa etdirilməsi nəzərdə tutulan ərazidə qazilər qanunsuz olaraq avtoyuma məntəqəsi tikir”.
Bu iddia ilə qafqazinfo.az-a Yeni Günəşli 5-ci massiv, bina 21-in sakinləri müraciət edib.
Şikayətçilər bildirib ki, bununla bağlı sakinlərə heç bir xəbərdarlıq edilməyib: “Qazilər qrup halında mayın 9-u gecə saatlarında obyekti parka yerləşdiriblər, heç bir icazə sənədləri də yoxdur. Binamızın hər tərəfində park salınıb, bu ərazidə də salınması ilə bağlı qərar verilmişdi. Orada ağac əkməyə belə icazə verilmirdi. Necə oldu ki, bu adamlar belə addım atır?!”
Sakinlər bununla bağlı müvafiq qurumlara da şikayətlər ediblər: “Obyekti qeyri-iş günündə qoyduqları üçün aidiyyəti qurumlardan cavab ala bilməmişik, hələ də oradadır, qaldırılmayıb. Bütün sakinlər bundan narazıdır. 55 nəfər vətəndaş məsələ ilə bağlı polisə şikayət ərizəsi də yazıb”.
Məsələ ilə bağlı Suraxanı Rayon İcra Hakimiyyətinə sorğu ünvanlanıb. Qurumdan müraciətə verilən cavab isə belə oldu: “Vətən müharibəsi qazisi Hüseyn Fərəcov ona məxsus olduğunu iddia etdiyi sözügedən ərazidə yüngül konstruksiyalı qaraj qoyub, RİH tərəfindən vətəndaşa qarajın götürülməsi tövsiyə edilib”.
