“Səbir bizə təkcə məmulatı hazırlayanda deyil, həm də müştərilərlə ünsiyyətdə lazımdır”.
Bu sözləri Bakuplus.az-ın müsahibi zərgər Camal Qasımov deyib.
Onunla müsahibəni təqdim edirik:
- Camal bəy, öncə özünüzü təqdim edərdiniz.
- Camal Cümşüd oğlu Qasımov. 1992-ci ildə Bakı şəhərində anadan olmuşam. Uzun müddətdir ki, zərgərliklə məşğul oluram.
- Zərgərlik sənətinə marağınız necə yarandı?
- Atam zərgər olub. Gözümü açandan zərgərliyi, qızıl-zinət əşyaları ilə işləməyi görmüşəm. Gördükcə özümün də bu sahəyə marağım yarandı. Çox fərqli və gözəl sənətdir. İnsandan çox səbir tələb edir. Atamın əlinə baxa-baxa 2012-ci ildən bu sənətə başladım.
- Düşünürəm ki, zərgərlikdə tək qızılı hazırlayarkən yox, həm də müştərilərlə ünsiyyətdə də səbir lazımdı...
- Müştərilərin hərəsi bir cürdür. Hərəsinin bir cür xarakteri, yanaşma tərzi var. Bəli, səbir bizə təkcə məmulatı hazırlayanda deyil, həm də müştərilərlə ünsiyyətdə lazımdır. Müştərinin fikrini, istədiyini gərək düzgün tapa biləsən. Əgər müştəri bura gəlibsə, deməli, ağlında nə isə tutub gəlib. Bizim işimiz onu tapa bilmək, ona uyğun xidmət göstərməkdir.
- Bu illərdə qarşılaşdığınız maraqlı bir hadisə olubmu?
- Xanıma üzük satmışdım. Bir müddət sonra gəldi ki, mənə aşağı əyarlı qızıl satıbsan. Öz işimə həmişə əmin olmuşam. Amma çox narahat oldum. Əyarını yoxladım, gördüm ki, təmizdir. Sonra məlum oldu ki, xanımın bədəninin turşuluğu çoxdur, ona görə də barmağında qaralıq verirmiş. Yəni hər cür müştəri olur. Buna görə deyirəm, zərgərə səbir lazımdır.
- İlk hazırladığınız zərgərlik əşyası nə olub? Xatırlayırsınız?
- Mən zərgərliyə başlayan vaxtlarda “şəbəkə” qolbaq, sırğalar dəbdə idi. Həvəslənirdim ki, onu düzəldim. Elə ilk əl işim həmin qolbaqlar oldu.
- Zərgərlikdə ən çox sevdiyiniz texnika və ya üslub hansıdır?
- Ən sevdiyim cilalama prosesidir. Çünki o, metala daha çox gözəllik qatır, parıldadır. Həm də cilalamadan sonra onunla iş bitir. İşin qurtardığına sevinirik.
- Xüsusi sifarişlə hazırladığınız ən yadda qalan zinət əşyası hansı olub?
- Fərqli sifarişlər çox almışıq. Amma yadımda qalan - qızıl daraq və qızıl kəmər istədilər. İndi də belə sifarişlər olur.
- Hazırda Azərbaycanda və ya dünyada zərgərlik sənayesində hansı tendensiyalar var? Hansı modellərə tələbat çoxdur?
- Hazırda qızıl bazarında ən çox “Cartier”, “Tiffany” və “Bvlgari” modellərinə tələbat çoxdur. İnsanlar brendlərin qızıl əşyalarını sifariş edilər.
- Qızıl alan zaman müştərilər aldanmamaq üçün nələrə diqqət etməlidir?
- Tövsiyə edərdim ki, müştərilər ən çox qızılın içərisinin boş olub-olmamasına diqqət etsinlər. Çünki belə modellərdə xırda əzik və cızıqlar çox olur ki, fikir verilmir. Bununla yanaşı, sırğa alan zaman hər ikisinin çəkisinin eyni olmasına fikir versinlər. Bəzi markalar da var ki, onların istehsalında hazır halqalar olur. Onların arasına mis və s. salırlar.
Fidan İlqar
