Qurban bayramına iki həftədən də az vaxt qalıb. Ətin qiyməti hələ də sabit olsa da, ötən illərin təcrübəsini nəzərə alsaq, ət məhsullarının bahalaşması gözlənilən faktdır. Bu haqda bu gün, 13 iyun tarixində Bakuplus.az Bizim.Media-ya istinadən məlumat verir.
İqtisadçı-ekspert, Liberal İqtisadçılar Mərkəzinin sədri Akif Nəsirlinin sözlərinə görə, ətin qiymətində bahalaşma gözlənilir. Qiymətlərin stabilliyini isə o, isti hava və aşağı tələbatla əlaqələndirir.
Ekspertin sözlərinə görə, Qurban bayramı ərəfəsində diri mal-qara bazarında qiymət artımı olacaq, kəsim məntəqələrində isə ucuzlaşma gözlənilir.
“Bahalaşma, əsasən, diri heyvan bazarında müşahidə olunacaq. Məsələn qəssabxanalarda bu günlərdə o qədər də ciddi bahalaşma hiss olunmayacaq. Bu dönəmdə, hətta qəssabxanalarda ucuzlaşmanın olacağı gözləniləndir. Bu il Qurban bayramında əvvəlki illər kimi bahalaşma müşahidə olunmayacaq. Çünki bayram elə bir vaxta düşür ki, bu ərəfədə ətə təlabat minimum həddədir. Ona görə də bahalaşma ancaq diri heyvan bazarında müşahidə olunacaq”, - deyə ekspert əlavə edib.
