Dahi musiqiçi Rəşid Behbudovun kürəkəni Kamil Şahverdinin evindən təqribən 54.000 manat dəyərində qızıl-zinət əşyalarını oğurlayan şəsxə hökm oxunub. Bu haqda bu gün, 15 iyul tarixində Bakuplus.az Qafqazinfo-ya istinadən məlumat verir.
Məhkəmə prosesi zamanı məlum olub ki, evdə xadimə kimi çalışan 42 yaşlı İrina Vatolina işlədiyi müddətdə gizli olaraq hissə-hissə olmaqla 53.814 manat dəyərində çoxsaylı qızıl-zinət əşyalarını, bahalı bəzək əşyalarını, medalyonları qarət edib.
Ev sahibinin sözlərinə görə, oğurlanan əşyaların əksəriyyəti SSRİ Xalq artisti Rəşid Behbudovdan qızı, yəni onun həyat yoldaşı Rəşidə Behbudovaya yadigar qalıb və bu əşyalar onlar üçün böyük mənəvi dəyərə malikdir.
İrina Vatolinaya qarşı cinayət işinin materialları Bakı Ağır Cinayətlər Məhkəməsinə göndərilib. Məhkəmədə təqsirləndirilən şəxs oğurluq əməlini inkar edib. O, evdən yalnız bijuteriya əşyaları və bir neçə istifadəyə yararsız elektron əşyalar götürdüyünü və sonradan geri qaytardığını bildirib. Kamil Şahverdi bildirib ki, Rəşid Behbudovun onlar üçün böyük əhəmiyyət kəsb edən əşyaları geri qaytarılarsa, İrinadan şikayətlərini geri götürə bilərlər.
İyulun 11-də Vatolinaya hökm oxunub. Qadın təqsirli bilinərək 5 il müddətinə azadlıqdan məhrum edilib və məhkəmə zalında həbs edilib.
Kamil Şahverdi uzun illər Space TV-nin icraçı direktoru, 2021-2022-ci illərdə isə kanalın rəhbəri olub. Həmçinin o, Rəşid Behbudov Fondunun direktorudur. Rəşidə Behbudova isə xeyli vaxtdır yataq xəstəsidir və ev şəraitində müalicə olunur.
