“Sofar” Bakıda açıq hava konserti keçirəcək. Bu haqda bu gün, 3 iyul tarixində Bakuplus.az təşkilata istinadən xəbər verir.
Tədbir 7 iyul saat 19:00-da başlayacaq. Qeydiyyatdan keçmək üçün ilk növbədə “Sofar”-ın rəsmi saytı vasitəsilə müraciət göndərilməlidir. Yer məhdudiyyəti olduğundan iştirakçılar təsadüfi şəkildə seçilir və onların poçt ünvanlarına təsdiq məktubu göndərilir. Məkan haqda məlumat ənənəvi olaraq konsertə 24 saat qalmış açıqlanacaq.
Bu konsert "İçərişəhər" Dövlət Tarix-Memarlıq Qoruğu və “Sofar Sounds Baku” ilə əməkdaşlıq çərçivəsində reallaşacaq.
“Sofar Sounds” 2009-cu ildə Londonda yaradılıb və hazırda 400-dən çox şəhər, 80-dən çox ölkədə fəaliyyət göstərir. Məqsədi istedadlı musiqiçilərə dəstək olmaq və hər kəsin yaxın otura biləcəyi mühitdə konsertlər təşkil etməkdir.
