Paytaxtın Sabunçu rayonu, Bakıxanov qəsəbəsi, Sülh küçəsi 54 ünvanında inşa olunan yeni tikilidə kommunal xidmətlər yoxdur. Bu haqda bu gün, 31 may tarixində Bakuplus.az Real TV-yə istinadən xəbər verir.
Tikintisi 2015-ci ildə başlamış binadan vətəndaşlar çıxarışla mənzil alıblar. Onlara söz verilib ki, 2-3 aya bina kommunal xidmətlərlə təmin olunacaq, ancaq bu günə qədər məsələ həll olunmayıb.
Su, qaz və işıq qonşu binalardan çəkilib, bina üçün birbaşa xətt mövcud deyil. Evlərdə qaz balonu istifadə etməyə məcbur olan sakinlər təhlükə altındadırlar, eləcə də açıqda qalan elektrik naqilləri onları narahat edir.
“25-lik boru ilə 8 mərtəbəli binaya su verilir. İki nəfər aşağıdan su açanda yuxarı su çatmır”, - deyə sakinlərdən biri şikayətini bildirib.
Bundan əlavə, 2019-cu ildə qonşuluqda yeni binanın inşasına başlansa da, tikinti yarımçıq dayandırılıb. Bu da azyaşlılar üçün növbəti təhlükə yaradıb.
Mənzillərin çıxarışları olsa belə, onları satmaq da mümkün deyil. Sakinlərin sözlərinə görə, bina qanunsuz olduğu iddiası ilə məhkəmədədir. Bu səbəbdən ev alqı-satqısı mümkün deyil.
Bina sahibi məsələ ilə bağlı bütün problemlərin yaxın zamanlarda həll olunacağını vəd edib.
[caption id="attachment_46558" align="alignnone" width="800"] Foto Real TV-nin rəsmi Youtube kanalı[/caption]
