Sabunçu rayonu Ramana qəsəbəsinin sakinləri yolların vəziyyətindən narazıdırlar. Bu haqda 15 fevral tarixində Realtv məlumat verib.
Ramana qəsəbəsi 2-ci sahədə yaşayan sakinlərin problemi Hüseynbala Əliyev, Muxtar Maniyev, Ramiz Qənbərov, Seyid Əzim Şirvani və digər küçələrdəki yolların təmirsiz olması ilə bağlıdır. Onlar bildirir ki, öncəki illər keçilməz olan yolu öz hesablarına qismən yararlı hala salsalar da, burada əsaslı təmir aparılmayıb.
Sakinlər deyir ki, yağışlı hava yoldan istifadəni daha da çətinləşdirir. Yolun təmir olunması üçün aidiyyəti orqanlara da dəfələrlə müraciət ünvanlandığını, lakin problemin həll olunmadığını bildirən sakinlər yenidən Sabunçu rayon İcra Hakimiyyətinə üz tutduqlarını, AAYDA-ya ərizə ünvanladıqlarını qeyd ediblər.
Məsələ ilə bağlı Sabunçu Rayon İcra Hakimiyyəti bildirib ki, dövlət proqramı üzrə bu küçələrin təmiri nəzərdə tutulub. Yaxın gələcəkdə sözügedən küçələrdə təmir-bərpa işlərinin aparılması gözlənilir.
[caption id="attachment_33580" align="alignnone" width="800"] Foto RealTV[/caption]
