Azərbaycan Avtomobil Yolları Dövlət Agentliyi Sabunçu Rayon İcra Hakimiyyəti ilə birgə rayon ərazisində avtomobil yollarının yenidən qurulması və abadlaşdırılması işlərini davam etdirir. Bu haqda İH-nin mətbuat xidməti bu gün, 27 may tarixində məlumat verib.
Layihə çərçivəsində Bakıxanov kəndinin Əli Kərim və Ruhulla Axundov küçələrinə asfalt döşənib. Bundan əlavə, rayonun digər yaşayış məntəqələrində də küçələrdə genişmiqyaslı abadlıq işləri aparılır.
Həmçinin, abadlıq işlərinə tarixi abidələrin bərpası, evlərin fasadlarının təmiri, kanalizasiya şəbəkələrinin çəkilməsi, küçələrin işıqlandırılması, səkilərin salınması, məişət tullantılarının yığılması, bəzək kollarının və güllərin əkilməsi daxildir.
Rayonda yol infrastrukturunun yenidən qurulması, məhəllələrdə təmirə ehtiyacı olan küçə və yolların asfaltlanması, o cümlədən yeni su və kanalizasiya xətlərinin çəkilişi mərhələli şəkildə davam etdirilir.
