Sabunçu rayonunda mərkəzləşdirilmiş kanalizasiya şəbəkəsi mövcud deyil. Bu haqda 2 mart tarixində Bakuplus.az ATV-yə istinadən xəbər verir.
Zabrat-1 qəsəbəsi, Cəmşid Naxçıvanski küçəsində yaşayan sakinlərin əsas problemi qəsəbədə mərkəzləşdirilmiş kanalizasiya şəbəkəsinin olmaması ilə bağlıdır. Bu səbəbdən addım başı hər küçədə vətəndaşlar tərəfindən qazılmış xüsusi quyulara rast gəlmək mümkündür. Yay aylarında, yağış yağanda isə bu kanalizasiya quyuları mütəmadi olaraq daşır və ətrafda xoşagəlməz mənzərə, pis qoxu yaranır.
Sakinlər deyir ki, həftədə bir dəfə bu quyuların daşınmasına 10-15 manat arası pul verirlər. Bu da maddi cəhətdən onlara sərf etmir. Onların sözlərinə görə, qonşu küçələrdəki evlər mərkəzi kanalizasiya şəbəkəsinə qoşulsalar da, Cəmşid Naxçıvanski küçəsindəki evlər bu prosesdən kənarda qalıb.
“Kanalizasiya xətti ilə bağlı həmin ərazinin bir hissəsi üçün vəsait ayrılsa da, sözügedən küçə üçün hələ ayrılmayıb. Növbəti mərhələdə vəsait ayrılacağı təqdirdə həmin ərazidə işlərin davamı keçiriləcək. Həm Zabrat-1-də, həm Zabrat-2-də belə ərazilər var ki, orada ümumiyyətlə mərkəzləşdirilmiş infrastruktur qurulmayıb”, - məsələ ilə bağlı “Azərsu” ASC-nın mətbuat xidmətinin rəhbəri Anar Cəbrayıllı açıqlama verib.
