3 saylı Şəhər Klinik Xəstəxanasında tibb kadrlarının çatışmazlığı olduğu iddia edilir. Bu haqda bu gün, 7 mart tarixində Bizim.Media məlumat verib.
Xəstələrin yaxınlarının sözlərinə görə, ağır vəziyyətdə xəstəxanaya çatdırılan insanlar 1 saatdan artıqdır ki, dəhlizdə gözləyirlər. İlkin müayinə üçün isə həkim tapmaq mümkün deyil.
Həkimlər bu vəziyyəti xəstələrin sayı ilə əlaqələndirirlər.
Tibbi Ərazi Bölmələrinin İdarəetmə Birliyindən (TƏBİB) 3 saylı Şəhər Klinik Xəstəxanasında həkim çatışmazlığının olduğu təsdiqlənib.
“Sabunçu Tibb Mərkəzində qismən tibb personalı çatışmazlığı mövcuddur. Xüsusilə də tibb bacısı, porter sahələrində çalışanlara ehtiyac var. Bununla əlaqədar olaraq bildiririk ki, kadr çatışmazlığını aradan qaldırmaq və vətəndaşlara göstərilən tibbi xidmətlərin keyfiyyətini artırmaq məqsədilə vakant yerlər üzrə kadrların işə cəlb olunması istiqamətində addımlar atılır”, - deyə qurumdan bildirilib.
