Bakıda şagirdlərin şüuraltına təsir edəcək məktəb ləvazimatlarının satılması ilə bağlı məlumatlar yayılıb.
Bu barədə görüntülər sosial şəbəkələrdə paylaşılıb və cəmiyyətdə narahatlıq doğurub.
Belə ki, məktəb ləvazimatları mağazalarının birində silah formasında qələmlər satışdadır.
Bu cür məhsulların satışının etik və hüquqi aspektləri maraq doğurur. Bəs görəsən, belə ləvazimatların satışı niyə qadağan edilməyib?
Mövzu ilə bağlı BakuPlus.az-a açıqlama verən Azad İstehlakçılar Birliyinin (AİB) sədri Eyyub Hüseynov bu məsələni azad bazar iqtisadiyyatı ilə əlaqələndirib:
“Azad bazar iqtisadiyyatıdır. Bəzi yerlərdə soyuq silahlar açıq satılır. Qadağan olunmalıdır. Lakin belə qadağalar yoxdur. Avropa və Amerikada isə açıq satışı həyata keçirilir. Biznesin inkişafı üçün bu yola əl atılır.
Tüfəngi imitasiya edən malların satılmasını qanun qadağan etmir. Belə qadağa çox çətindir. Bu kimi mallar məktəblilərin düşüncələrinə təsir edir. Şüuraltlarında baza yaranır. Cizgi filmlərinin də təsiri olur. Bu kimi məsələlər kapitalizmdən irəli gəlir”.
Psixoloq Aytən Ələkbərova isə əlavə edib ki, bu tip ləvazimatlar uşaqların şəxsiyyət kimi formalaşmasına təsir edəcək:
“Övladlarımızın məktəbə getməsi ikinci şəxsiyyət dövrüdür. Artıq xarakterlərinin formalaşması mərhələsi başlayır. Daha həssas olmalıyıq. Məktəbə gedən uşaqlara bu cür ləvazimatlar alsaq, bu, onların şəxsiyyət kimi formalaşmasına təsir edəcək.
Kriminal aləmə maraq yaranacaq. Sinifdə üç uşaqda bu maraq yaranarsa, bu, digərlərinə də ötürüləcək. Biz onların kiçik və böyük yeniyetməlik dövründə cinayətləri ilə də qarşılaşa bilərik. Ölüm halı da ola bilər”.
“Yeniyetmələr ilə aparan söhbətlərin nəticəsində onların psixologiyalarına filmlərin böyük təsir etdiyini görə bilərik. Özünü kimə bənzədirsən soruşanda, film qəhrəmanlarının adını çəkirlər. Mütləq şəkildə diqqətdə saxlamalıyıq. Bu cür məktəb ləvazimatlarının satılması qadağan edilməlidir”, - deyə A.Ələkbərova fikrini tamamlayıb.
Nəzrin Vahid
