Son günlər ölkə ərazisində kəskin isti hava müşahidə olunur. Regionlarla bərabər, Bakıda da temperaturun qarşıdakı günlərdə artacağı deyilir. Paytaxtda isə tikintidə açıq havada gün altında işləyən xeyli insan görmək mümkündür. Bu haqda bu gün, 10 avqust tarixində Bakuplus.az Baku TV-yə istinadən məlumat verir.
Bir neçə ünvanda işin dayandırıldığı müşahidə olunsa da, fəaliyyətini davam etdirən tikintilərə də var. Adının Samir olduğunu deyən şəxs işçilərin isti havalarda işləməməklə bağlı təlimatlı olduqlarını bildirib: “İş səhər tezdəndən başlayır, nahara kimi işləyirlər”.
Lakin reallıqda isti şüaların altında çalışan insanların görüntüləri bunun əksini göstərir.
“Burada kimisə məcbur işlətmirlər. “Səhərdən axşamacan orada olmalısan”, – belə söz deyilməyib. Hər bir kəsə də məlumat verilib ki, hava istidir, istini nəzərə alsınlar, işləməsinlər”, – deyə tikinti şirkətinin əməkdaşı əlavə edib.
Dövlət Əmək Müfəttişliyi Xidməti isə bildirir ki, havanın temperaturu 41 dərəcədən çox olarsa, işçilərin həyat və sağlamlığının qorunması üçün zəruri tədbirlər görülməlidir.
“Dövlət Əmək Müfəttişliyi Xidməti olaraq bildiririk ki, havanın temperaturunun 41 dərəcədən çox olduğu hava şəraitində əmək qanunvericiliyinin tələblərinə əsasən, işçilərin həyat və sağlamlığının qorunması üçün zəruri tədbirlər görmək işəgötürənin əsas vəzifələrindən biridir. Qeyd edək ki, əmək məcəlləsinin 133-cü maddəsinə uyğun olaraq, havanın temperaturu 41 dərəcədən çox olan hava şəraitində açıq havada və sərinləşdirici qurğular olmayan binalarda, otaqlarda və digər iş yerlərində bütün növ işlərin görülməsi dayandırılmalıdır”, – deyə Dövlət Əmək Müfəttişliyi Xidmətinin mətbuat katibi Aynur Osmanqızı açıqlama verib.
