Küçədə sevgilisinin barmaqlarını sındıran şəxsə cəza verilib.
Bakuplus.az-ın məlumatına görə, hadisənin istintaqı Abşeron Rayon Məhkəməsində keçirilib.
Belə ki, təqsirləndirilən Cabbar Osmanov (ad, soyad şərtidir) taksi fəaliyyəti ilə məşğul olur. O, sevgilisi, zərərçəkmiş Sevil Əliyeva (ad və soyad şərtidir) ilə onun avtomobilinə müştəri qismində əyləşdiyi zaman tanış olub. Daha sonra onların arasında sevgi münasibətləri yaranıb və birgə yaşayıblar. Bu münasibətlərdən uşaq dünyaya gəlib. Cabbar kirayə pulunu ödəyə bilmədiyi üçün qadın anasının yanında yaşamağa başlayıb və bundan sonra onların arasında münasibətlər pozulub.
Hadisə günü cütlük küçədə mübahisə edən zaman Cabbar Sevilin sağ əlinin barmaqlarını qırıb. Ardınca isə döyməyə başlayıb.
Nəticədə Cabbar Osmanov Azərbaycan Respublikası CM-nin müvafiq maddəsi ilə təqsirləndirilib.
Məhkəmədə ifadə verən təqsirləndirilən Cabbar Osmanov deyib ki, hadisə Abşeronda yaşadığı binanın həyətində baş verib. Sevillə mübahisə etməyə başlayıb. Bu zaman o, qadının ünvanına nalayiq ifadələr işlədərək, heç bir əsaslı səbəb olmadan onun sağ əlinin barmaqlarını qəsdən buraraq sındırıb.
Məhkəmənin hökmü ilə Cabbar Osmanova 11 ay 26 gün müddətinə azadlığın məhdudlaşdırılması (elektron qolbaq) cəzası təyin edilib.
Fidan İlqar
