Bakıda bir qadın 440 manata aldığı təbii saçın saxta olduğunu iddia edir.
Bakuplus.az xəbər verir ki, o, bu barədə sosial şəbəkədə yazıb.
Onun sözlərinə görə, Əşrəf Əliyev küçəsi 41 ünvanında yerləşən saç mağazasından 250 qram saç alıb.
“Ödənişi həmin mağazada bank kartı vasitəsilə həyata keçirmişəm. Alış zamanı satıcıya saçların mütləq şəkildə təbii və keyfiyyətli olmasının vacib olduğunu bildirdim. Satıcı isə mənə saçların tamamilə təbii olduğunu təsdiq etdi. 22 aprel 2025-ci il tarixində saç uzatma üzrə mütəxəssisə müraciət etdim. İş zamanı mütəxəssis mənə təqdim etdiyim saçların süni olduğunu və göstərilən keyfiyyətə uyğun gəlmədiyini bildirdi. Dərhal satıcı ilə əlaqə saxladım və problemi izah etdim. Lakin satıcı bütün saçların təbii və istifadəyə yararlı olduğunu iddia etdi. Ertəsi gün saçlarımı yuduqdan sonra onların vəziyyəti kəskin şəkildə pisləşdi və istifadəyə yararsız hala düşdü. 23 aprel tarixində yenidən satıcı ilə, daha sonra isə mağaza sahibi Xəbil adlı şəxs ilə əlaqə saxladım və təbii saçlarla dəyişdirilməsini tələb etdim. Lakin mağaza sahibi problemi düzgün saç yuma texnikasının olmaması ilə izah etdi və xüsusi şampunlar almağı tövsiyə etdi”.
Şikayətçi bildirib ki, daha sonra 100 manat dəyərində şampun və buruq saçlar üçün balzam aldım:
“Nəticə dəyişmədi. Bundan sonra ödədiyim məbləğin qaytarılmasını və məhsulun geri alınmasını tələb etdim. Lakin mağaza sahibi bu tələbimi rədd etdi və “istəsən polisə, istəsən vergi orqanlarına müraciət et, heç nədən qorxmuram” deyə cavab verdi. Qeyd olunan faktla bağlı tədbir görülməsini, məsul şəxslərin qanunvericiliyə uyğun şəkildə cəzalandırılmasını və istehlakçı hüquqlarımın qorunmasını xahiş edirəm. Ödədiyim 440 manat və əlavə çəkdiyim 100 manatlıq xərc mənim üçün əhəmiyyətli məbləğdir. Həmçinin bildirirəm ki, ödənişin həyata keçirilməsini bank çıxarışları ilə təsdiq edə bilərəm”.
Müştəri onu da qeyd edib ki, alış zamanı heç bir qəbz təqdim olunmayıb.
Məsələ ilə bağlı sözügedən mağaza ilə əlaqə saxlamağa çalışsaq da, cavab verən olmadı. Qarşı tərəfin mövqeyini paylaşmağa hazırıq.
